ان جيتني تنشد عن الحال ياخيّ
شف وردتي ذبلت على المزهريه
ماتت عطش وايامها ترجي الريّ
يوم انقطع نبع المياه العذيه
احاول اطوي صفحته داخلي طيّ
وتطويني الذكرى ثمانين طيه
اذكر ليال الشيطنه واول الغيّ
يوم القصايد في جنابه نديه
يلبس قصيدي بالغلا عقد وحليّ
صبح ومسا يلبس قصيدي هديه
اسريه ليل ٍ يشتعل داخلي ضيَّ
محلاك ياليل ٍ شعى فيه ضيه
برق ورعد ورذاذها يسعد الحيّ
نسناسها غربي وريحه نديه
ريح الغزال اللي سقاني من الميّ
من سلسبيل ٍ مابعد ذقت زيه
واليوم راح ولابقى داخلي شيّ
غير السراب وليلة ٍ جرهديه
الحال هذي حالتي يابعد حيّ
من جيت للدنيا وهي سرمديه
فيني من الضيقه بحر واكثر شويّ
وفيني طنا من عزوة ٍ شمريه
شمس القوايل لو زمت شفتها فيّ
الراس شامخ والعزايم قويه
ياخاطري لاتنكسر دامني حيّ
من شان لاتِفرح عذولي عليه
شعر :مجتبى البطي
